کرزي د یوناما له سیاسي مرستیال سره په لیدنه کې د تلپاتې ثبات د تامین لپاره پر ملي تفاهم ټینګار وکړ

د معمار پرس د خبر له مخې؛ پخواني ولسمشر حامد کرزي د ملګرو ملتونو د عمومي منشي له ځانګړي استازي (د یوناما سیاسي مرستیال) مارکوس پوتزل سره په کتنه کې د تلپاتې ثبات د تامین لپاره د ملي تفاهم پر اړتیا ټینګار وکړ. کرزي همدا راز د چهارشنبې په ورځ (د حوت ۱۶مه) په ایکس کی وویل چې په دې کتنه کې یې د افغانستان او سیمې پر روانو حالاتو خبرې وکړې. په همدې حال کې ښاغلي کرزي له افغانستان سره د متحدینو هېوادونو له همکاریو مننه وکړه او د نجونو لپاره یې د ښوونځیو او پوهنتونونو پر بیا پرانیستلو ټینګار وکړ. په تېر یوه کال کې کرزي له بهرنیو چارواکو سره په خپلو لیدنو کې تل د نجونو پر زده کړو د بندیز پر لرې کولو او د افغانانو تر منځ د خبرو پر پیل ټینګار کړی دی.