په ایلینوی ایالت کې د ټاکنو له رای پاڼو څخه د ټرمپ نوم لرې کول

د معمار پرس د خبر له مخې؛ د امریکا په ایلینوی ایالت کې یوه قاضي امر کړی، چې په دغه ایالت کې د جمهوري غوښتونکو ګوند په لومړنیو ټاکنو کې دې د “ډونالډ ټرمپ” نوم له رای پاڼو څخه لرې شي. او په بل عبارت، د جمهوري غوښتونکو ګوند دغه مخکښ شخصیت ته د ایلینوی ایالت په لومړنیو ټاکنو کې د ګډون اجازه نه وه ورکړل شوې. همدارنګه د هغه ټیم ته یوازې دوه ورځې وخت ورکړل شوی چې د استیناف غوښتنه وکړي. په داسې حال کې چې د امریکا پخوانی ولسمشر “ډونالډ ټرمپ” په محکمه کې له ګڼو تورونو او دوسیو سره مخامخ دی، خو د لومړنیو ټاکنو له پیل راهیسې، د خپل ګوند مخکښ او ګټونکی مخ دی او د چهارشنبې په ورځ یې په میشیګان ایالت کې خپلې سیالې نیکي هیلي ته، چې په ملګرو ملتونو کې د امریکا پخوانۍ سفیره وه، ته ماتې ورکړه او په دغه ایالت کې د جمهوري غوښتونکو ګوند لومړني انتخابات وګټل.