په کابل کې د ایران مرستیال سفیر: موږ له کابل سره په خپلو اړیکو کې هیڅ ډول محدودیت نه لرو

د معمار پرس د خبر له مخې؛ دا خبره په کابل کې د ایران د سفارت مرستیال غلام رضا نجاري کړې ده چی که څه هم تهران د طالبانو سرپرست حکومت په رسمیت نه دی پېژندلی خو له کابل سره په ټولو برخو کې ښې اړیکې لري او دا اړیکې ورځ تر بلې ښه کیږي. ښاغلي نجاري له طلوع نیوز سره په مرکه کې وویل چې دی هیله من دی چې طالب چارواکي به د نړیوالې ټولنې له خوا د خپل سرپرست حکومت په رسمیت پېژندلو لپاره اساسي ګامونه پورته کړي. په کابل کې د ایران د سفارت مرستیال وویل:«که څه هم موږ تر اوسه د سرپرست حکومت په رسمیت نه دی پېژندلی خو موږ له افغانستان سره په خپلو تعاملاتو کې کوم محدودیت نه لرو او اړیکې د دوو ګاونډیو هېوادونو په توګه په هره کچه روانې دي.»