ملا یعقوب د پرمختیايي پروژو د امنیت په تامین او د سرحدونو پر امنیت ټینګار وکړ

د معمار پرس د خبر له مخې؛ د طالبانو د دفاع وزارت اعلان وکړ چی د دغه وزارت سرپرست محمد یعقوب مجاهد د چین، ایران او پاکستان له استازو سره د یوې غونډې په څنډه کې وکتل او په افغانستان کې يې د پرمختيايي پروژو د امنيت په اړه ډاډ ورکړ. د طالبانو د دفاع وزارت د سه شنبې په ورځ (د دلو ۱۰مه) د یوې خبرپاڼې په خپرولو سره اعلان وکړ چې محمد یعقوب مجاهد په کابل کې د طالبانو په کوربه توب د افغانستان د سیمه ییزو همکاریو د نوښت له غونډې وروسته د ۱۱ هېوادونو له استازو او سفیرانو سره وکتل. د خبرپاڼې په حواله، مجاهد بیا د چین، ایران او پاکستان له استازو او سفیرانو سره په جلا جلا توګه وکتل او د “د هېواد د پولو د ثبات او امنیت د ټینګښت، د اړیکو او اقتصادي همکاریو د پیاوړتیا” په برخه کې یې د طالبانو د ژمنو ډاډ ورکړ. هغه ویلي دي چې طالبان په افغانستان کې د هیوادونو د پرمختیايي پروژو د پیل او بشپړولو په خاطر د امنیت او هر ډول نورو همکاریو تضمین ته چمتو دي.