د طالبانو د اطلاعاتو او کلتور وزیر: په افغانستان کې د جامع حکومت د جوړولو هدف د جاسوسانو ټاکل دي

د طالبانو د اطلاعاتو او کلتور وزیر ملا خیرالله خیرخواه د شنبې په ورځ د جدي په ۲۳ مه په کابل په یوه غونډه کې وویل چی هغه هیوادونه چې په افغانستان کې د «ټول شموله حکومت» غوښتونکي دي، په دې هیواد کې د خپلو «جاسوسانو» او «ملګرو» د ځای پر ځای کولو پلان لري. هغه زیاته کړه چې د طالبانو نظام اوس “ټول شموله” دی او په هغه کې پراخو بدلونونو ته اړتیا نشته. په 1400 کال کې د اسد په میاشت کې د طالبانو د واکمنۍ څخه وروسته، نړیوالې ټولنې، نړیوالو او سیمه ایزو سازمانونو په وار وار ټینګار وکړ چې په افغانستان کې باید د ټولو توکمیزو ډلو او سیاسي جریانونو په شتون سره یو ټول شموله حکومت جوړ شي.