ملګرو ملتونو افغانستان ته له ستنېدونکو کډوالو سره د مرستې لپاره د ۱۰ میلیونه ډالرو د ځانګړي کولو اعلان وکړ

د معمار پرس د خبر له مخې؛ مارتین ګریفیتس، د ملګرو ملتونو د بشردوستانه چارو مرستیال او د بېړنیو مرستو همغږي کوونکي اعلان وکړ چې له پاکستان څخه د راستنېدونکو کډوالو سره د مرستې لپاره د دغه سازمان له اضطراري فنډ څخه لس میلیونه ډالره ځانګړي شوي دي. ښاغلي ګریفیتس په خپل ټویټر کې لیکلي چې د مرستې هدف له پاکستان څخه راستنیدونکو کډوالو او پناه غوښتونکو ته “د ژوند مرستې” چمتو کول او د دوی لومړني بشري اړتیاوې پوره کول دي. د ملګرو ملتونو د شمېرو له مخې، د سپټمبر له نیمايي راهیسې له ۳۲۷ زره ډېر بې اسناده کډوال او پناه غوښتونکي له پاکستان څخه افغانستان ته داخل شوي دي.