بريتانيا له پاکستانه د افغان کډوالو د لېږد لړۍ بيا پيل کړه

د معمار پرس د خبر له مخې؛ ایکسپریس ټریبیون ورځپاڼې خبر ورکړی، چې نن (پنجشنبه د عقرب په څلورمه) شاوخوا ۲۰۰ افغان کډوال له اسلام اباد څخه بریتانیا ته په لومړۍ الوتنه کې لېږدول کېږي. د دغې رسنۍ د راپور له مخې، د پاکستان د ملکي هوايي چلند اداره په پام کې لري چې د روان کال د ډسمبر تر پایه بریتانیا ته د افغان کډوالو د لېږدولو لپاره ۱۲ ځانګړې الوتنې ترسره کړي. دغې رسنۍ ویلي، چې د پاکستان د ملکي هوايي چلند ادارې له خوا د خپاره شوي مهالوېش له مخې به هره اوونۍ یوه الوتنه کېږي او په ټولیز ډول به شاوخوا دوه زره افغان کډوال له پاکستانه بریتانیا ته لېږدول کېږي.