د طالبانو د اوبو او انرژۍ سرپرست وزیر بلخ ته د اوبو او برېښنا د ستونزو د هواري په موخه سفر وکړ

د معمار پرس د خبر له مخې؛ د طالبانو د اوبو او انرژۍ وزارت سرپرست ملا عبداللطیف منصور د شنبې په ورځ د میزان په ۲۲مه بلخ ولایت ته سفر وکړ او د دغه ولایت لپاره د طالبانو له والي محمد یوسف وفا سره یې وکتل. په دې کتنه کې د بلخ والي په دغه ولایت کې د اوبو او انرژۍ د پروژو د تطبیق غوښتنه وکړه او شته ستونزې یې د اوبو او انرژۍ وزارت له سرپرست سره شریکې کړې. د طالبانو د اوبو او انرژۍ وزارت سرپرست وويل چی د امو بحر د څنډو د پیاوړتیا او په دغه ولایت کې د دغه وزارت د ټولو اړوندو پروژو له چارو به څارنه کوي او د شته امکاناتو له مخې به د دغه ولایت د خلکو د اوبو او برېښنا ستونزو ته پاملرنه وشي.