ملګري ملتونه: د طالبانو په حکومت کې ۱۷۳ خبریالان له تاوتریخوالي سره مخامخ شوي دي

په افغانستان کې د ملګرو ملتونو مرستندویه پلاوي یا یوناما ویلي چې طالبانو واک ته له رسېدو وروسته په پراخه کچه بشري حقونه تر پښو لاندې کړي دي.

د معمار وحدت د خبری آژانس د خبر له مخې؛ د یوناما نوی راپور چې نن چهارشنبه د سرطان ۲۹مه خپور شو، ښيي چې د ۲۰۲۱ کال د اګست له ۱۵مې څخه د ۲۰۲۲ کال د جون تر ۱۵مې پورې ۱۷۳ خبریالان له تاوتریخوالي سره مخ شوي چې له دې ډلې ۱۶۳ پېښې یې طالب چارواکو ته منسوبې شوې دي.

په دې موده کې طالبانو د خبریالانو د خپلسري نیولو ۱۲۲ قضيې، ۵۸ د ناوړه چلند، ۳۳ د ګواښ او ۱۲ د نیولو قضيې د خبریالانو له کار سره بې تړاوه مرتکب شوي دي.

د یوناما په نوي راپور کې راغلي چې په افغانستان کې د طالبانو د واکمنۍ په لسو میاشتو کې ۶ خبریالان وژل شوي چې ۵ یې داعش او یو یې نامعلومو کسانو ته منسوب شوی دی.

د يادونې وړ ده، چې د طالبانو له خوا له واک ته تر رسېدو مخکې او وروسته هم تل له خبريالانو سره له تاوتريخوالي ډک چلند شوى دى.