د ملګرو ملتونو امنیت شورا د افغانستان پر وضعیت د ارزونې په موخه غونډه کوي

د معمار پرس د خبر له مخې؛ د ملګرو ملتونو د امنیت شورا د سه شنبې په ورځ (د میزان ۴مه) د افغانستان د وضعیت د څیړلو په موخه غونډه کوي. په دې غونډه کې به په افغانستان کې د ملګرو ملتونو د مرستندویه پلاوي (یوناما) مشره روزا اوتونبایوا د افغانستان د وروستیو دریو میاشتو د وضعیت په اړه راپور وړاندې کړي. تمه ده چې د دې غونډې اصلي تمرکز به په افغانستان کې د ښځو او نجونو پر حقونو سخت محدودیتونه وي.