په تهران کې د افغان سفارت د قونسلګرۍ د خدمتونو لګښت له اعتراضونو وروسته بېرته خپل پخواني حالت ته راستانه شو

د معمار پرس د خبر له مخې؛ د فیسونو دا زیاتوالی، چې د شنبې راهیسې پلي شوی و، د مهاجرینو له پراخ منفي غبرګون سره مخ شو. ډیری کډوال د خپل خراب اقتصادي وضعیت له امله د دې درانه لګښتونو د ادا کولو توان نه‌درلودل. د مهاجرینو له اعتراضونو وروسته په تهران کې د افغانستان د سفارت سرچینو او هم د دغه سفارت په حواله مهاجرینو نن دوشنبه د میزان ۳مه تایید کړه چې د قونسلګرۍ د خدماتو تعرفه بیرته پخواني حالت ته راګرځیدلې ده.