شهباز شریف: د پاکستان پارلمان به په څلورو ورځو کې منحل شي

د معمار پرس د خبر له مخې؛ د پاکستان لومړي وزیر شهباز شریف په پنجاب ایالت په یوې غونډې کې اعلان وکړ چې د اسد په ۱۸مه به د هېواد پارلمان منحل شي او د سرپرست حکومت لپاره به لاره پرانستل شي. د اوسني پارلمان کاري دوره د اسد په ۲۱ مه پای ته رسیږي. پاکستان په داسې حال کې د پارلماني انتخاباتو موسم ته داخلیږي چې د شهباز شریف بانفوذه سیال عمران خان په درې کاله بند محکوم شو او د پاکستان له سیاسي صحنې څخه لیرې شو. تر اوسه د موقت حکومت د مشر نوم نه دی په ډاګه شوی. د پاکستان د کورنیو چارو وزیر رانا ثناالله تایید کړه چې د مالیې پخوانی وزیر حفیظ شیخ یو له انتخابونو څخه دی.