ستانکزی: افغانستان له پوهې، ښوونې او روزنې پرته پرمختګ نه شي کولای

د معمار پرس د خبر له مخې؛ د بهرنیو چارو وزارت سیاسي مرستیال شېرمحمد عباس ستانکزی وايي، افغانستان له تعلیم او پوهې پرته پرمختګ نه شي کولای. نوموړي په کابل کې د يو لړ مراسمو په ترڅ کې د لوړو زده کړو او پوهنې له وزارتونو وغوښتل چې دې اصل ته پاملرنه وکړي او په دې برخه کې لازمې اسانتياوې رامنځته کړي. هغه ټینګار وکړ چې د جګړو په کلونو کې افغانستان د پوهنې، روغتیا او کرنې په برخو کې د سیمې له هېوادونو وروسته پاتې شوی دی. خو اوس چې په هېواد کې خوندي چاپېریال رامنځته شوی، حکومت باید دغو مسایلو ته زیاته پاملرنه وکړي.