اندونيزيا ته د سرپرست حکومت د پلاوي سفر او د اقتصادي او سياسي اړيکو پر پياوړتيا خبرې وشوې

د معمار پرس د خبر له مخې؛ د سرپرست حکومت د بهرنیو چارو وزارت د یوې اعلامیې په خپرولو سره دغه اعلان وکړ چی د دغه وزارت د سیاسي مرستیال مغفورالله شهاب په مشرۍ له کابل څخه راغلي پلاوي اندونیزیا ته د خپل سفر په ترڅ کې په جاکارتا کې مېشتو دیپلوماتانو ته لازمې لارښوونې وکړې او د یو شمېر هېوادونو له ډیپلوماټانو سره یې وکتل. د طالبانو د بهرنيو چارو وزارت د وياند مرستيال ضيا احمد تکل وايي، دغه پلاوي د اندونيزيا له يو شمېر ديني عالمانو، سياستوالو او سوداګرو سره د دواړو هېوادونو د اقتصادي او سياسي اړيکو د پياوړتيا په اړه خبرې کړې دي. د صادراتو زیاتوالی، د پولي ثبات ټینګښت، له ګاونډیانو سره ښې اړیکې، په سیمه کې د ټرانزیټي اسانتیاوو او نورو فرصتونو په اړه په دغو ناستو کې بحثونه وشول.