د ملګرو ملتونو علمي، کلتوري او ښوونیز سازمان (یونسکو) له زده کړو د نجونو پر دوامداره محرومیت نیوکه کړې او ویلي یې دي چې د افغان ښځو او نجونو هیلې له منځه تللي دي. نن (چهارشنبه د سرطان ۱۴مه) یونسکو په ټویټر کې ویلي چې د ښځو او نجونو د تعلیم، روزنې او کار له اساسي حقه په بشپړه توګه سرغړونه شوې او دا وضعیت د منلو وړ نه دی. طالبانو په لومړي سر کې له شپږم ټولګي څخه پورته نجونې په ښوونځیو کې بندې کړې او بیا یې د تېر کال په پای کې د نجونو لپاره پوهنتونونه هم وتړل. دغه راز دغې ډلې ښځې په دولتي او نادولتي ادارو کې له کار کولو منع کړي دي.