ملا نورالله نوري: د افغانانو ستونزې حل کول او دوی ته خدمت کول د اسلامي امارت لومړیتوب دی
د سرحدونو، قومونو او قبایلو چارو وزارت سرپرست ملا نورالله نوري زابل ته د خپل رسمي سفر په ترڅ کې د دغه ولایت د شینکۍ، اټغر او سیوري ولسوالیو له قومي مشرانو سره په کتنه کې وویل، چې د هېوادوالو ستونزې حل کول او دوی ته خدمت کول د اسلامي امارت لومړیتوب دی.
د دغې کتنې پر مهال د یاد وزارت سرپرست ملا نورالله نوري، د زابل مرستیال والي محب الله حماس، د زابل د علماء د شورا غړی مولوي عبدالقدوس، د یاد ولایت د سرحدونو قومونو او قبایلو چارو رئیس عبدالکریم سحر، د شینکۍ ولسوالۍ امنیه قومندان نعمت الله شکېب د شینکۍ ولسوال زبیر آغا، قومي سپین ږیرو او عالمانو حضور درلود.
د کتنې په پیل کې د قومي سپین ږیرو په استازیتوب څو تنو د اسلامي نظام د ملاتړ ترڅنګ د تېر اشغال ماته او د اسلامي نظام ټینګښت یې د قومونو د قربانیو او یووالي برکت وباله.
دوی دغه راز د هېواد امنیت، او یووالی بې ساري یاد کړ او له حکومت څخه یې د څلورو ولسوالیو د سړک رغول او د لوی پل د جوړېدو غوښتنه وکړه.
ورته مهال ملا نوالله نوري د خپل سفر هدف د یادو ولسونو پوښتنه او د دوی ستونزې اورېدل یاد کړ او ویې ویل، چې د شینکۍ، سیوري او اټغر خلکو لوی ملا صاحب رحمه الله ته په خپله غېږه کې ځای ورکړی و.
نوري زیاته کړه، چې د اسلامي نظام په راتګ سره سمت پرستي قوم پرستي او تعصب له منځه تللي او د افغانانو وقار خوندي شوی دی.
نوموړي وویل، چې لکه څنګه چې مو پرون جهاد یوه فریضه وه اوس مو د دې ولس ساتل، د دوی ستونزې حل کول، دوی ته خدمت کول یوه فریضه ګڼلې او ستاسې ټولې ستونزې به موږ د حل په موخه تر لوړو مقاماتو رسوو.