په افغانستان کې د ملګرو ملتونو ښځینه کارکوونکي به له کوره خپل کار کوي
ملګرو ملتونو په ډاګه کړې، چې په افغانستان کې به یې ښځینه کارکوونکي له کوره کار کول روان وساتي؛ خو د کارکوونکیو د کار پر څرنګوالي اوس هم خبرې روانې دي.
د ملګرو ملتونو دغه پرېکړه له هغې یوه میاشت وروسته په ډاګه کیږي، چې د اسلامي امارت د یوه فرمان له مخې د ملګرو ملتونو په دفترونو کې د ښځینه کارکوونکیو پر کار کولو بندیز ولګول شو.
ملګري ملتونه په افغانستان کې شاوخوا ۳۳۰۰ کارکوونکي لري، چې ۴۰۰ یې ښځې دي.
د ملګرو ملتونو په دفترونو کې یوازې د افغانستان پر ښځینه کارکوونکیو بندیز لګېدلی او د دې ادارې ۶۰۰ نړیوالو کارکوونکیو خپل کارونه روان ساتلي دي.
ملګرو ملتونو له دې مخکې ویلي وه، چې د مې میاشتې تر پېنځمې / د غویی تر ۱۵ به په افغانستان کې پخپل ماموریت له سره کتنه وکړي او تر هغه وخته به د دغې ټولنې ښځینه کارکوونکي له کوره کار ورکړي.
د ملګرو ملتونو د ویاند مرستیال فرحان حق د جمعې پر ورځ ویلي، چې په افغانستان کې د ملګرو ملتونو د کار په دریځ کې کوم بدلون نهدی راغلی.
هغه زیاته کړې: مونږ کار کوو، چې په دې برخه کې د مناسبو کاري میتودونو په اړه پرېکړه وکړو. دا څرګنده ده، چې مونږ ننګونې لرو؛ ځکه د افغانانو اړتیاوې پراخه دي او مونږ اراده لرو، چې دا اړتیاوې له خنډ پرته پوره کړو.
هغه دا هم ویلي: د روغتیا او تعلیم په برخو کې ملګري ملتونه توانیدلي، چې د ښځو د کار لپاره محدود معافیت ترلاسه کړي.
په هرصورت، هغه یادونه وکړه، چې د ملګرو ملتونو ځینې ادارې ممکن بل ډول چلند وکړي.