په هرات کې د قومونو د یووالي او پیوستون په موخه ستره غونډه جوړه شوه
په هرات کې د سرحدونو، قومونو او قبایلو چارو وزارت له لوري په دغه ولایت کې د قومونو د یووالي او پیوستون په موخه ستره غونډه جوړه شوه.
د معمار آژانس د خبر له مخې؛ په دې غونډه کې د سرحدونو، قومونو او قبایلو چارو وزارت سرپرست ملا نورالله نوري د قومونو ترمنځ د یووالي او پیوستون غوښتنه وکړه او ویې ویل، چې اسلامي امارت په ټول توان هڅه کوي، څو په ټولو برخو کې هېوادوالو ته خدمتونه وړاندې کړي.
ورته مهال د هرات والي مولانا نور احمد اسلام جار وویل، چې په افغانستان کې مېشت ټول قومونه سره ورونه دي.
اخوا دیني عالمانو او د غونډې ګډونوالو د اسلامي امارت له نظام څخه د خپل ملاتړ د اعلان تر څنګ وویل، چې په هېواد کې مېشت ټول قومونه باید لاسونه سره یو کړي او یو د بل منلو لپاره کار وکړي.
هېره دې نه وي، چې له دې وړاندې هم د سرحدونو، قومونو او قبایلو چارو وزارت له لوري په بېلابېلو ولایتونو کې د قومونو د یووالي او پیوستون په موخه غونډې جوړې شوې وې.