د کانونو او پټرولیم وزارت سرپرست شیخ الحدیث شهاب الدین دلاور د سرپل د بلخاب ولسوالۍ له مشرانو او مخورو سره وکتل.
د باختر آژانس د خبر له مخې؛ د دغه وزارت په خپره شوې خبرپاڼه کې ویل شوي چې په دې کتنه کې، د بلخاب ولسوالۍ مشرانو د اسلامي امارت او ولس ترمنځ پر اړیکو او همغږۍ ټینګار وکړ.
هغوی دغه راز، په هېواد کې د اسلامي نظام پر ښه چلند خوښي ښودلې او ژمنه یې کړې، چې د بلخاب ولسوالۍ ولسونه به د اسلامي امارت د نظام ترڅنګ ولاړ وي او خپل دین، هېواد او خلکو ته به خدمت وکړي.
همدا رنګه، یادو مشرانو او مخورو خپلې یو لړ ستونزې او وړاندیزونه د کانونو او پټرولیم وزارت له سرپرست سره شریکې کړې او د حل غوښتنه یې کړې ده.
په همدې حال کې، د کانونو او پټرولیم وزارت سرپرست، د هغوی د ستونزو او وړاندیزونو په اورېدو سره، د سولې په تامین او د ملي یووالي په ټینګښت کې د مشرانو رول خورا مهم او ارزښتناک بللی او ژمنه يې کړې، چې د امکاناتو په پام کې نيولو سره به د خلکو ستونزې حل شي.