د بهرنيو چارو وزارت له پاکستان څخه په دغه هېواد کې د بندي افغانانو د خوشې کولو غوښتنه وکړه
د افغانستان اسلامي امارت د بهرنيو چارو وزارت يو ځل بيا له پاکستان څخه غوښتنه وکړه، چې په ياد هېواد کې بندي افغانان خوشې کړي.
ياد وزارت د يوې خبرپاڼې په خپرولو سره ویلي، چې په اسلام آباد کې د افغانستان سفارت او افغان جنرل قونسلګریو سره د پاکستاني ادارو او چارواکو له ژمنو سره سره لاهم په پاکستان، په ځانګړې ډول سند ایالت کې د ښځو او ماشومانو په ګډون نیول شوي افغانان له زندانونو څخه نه دي خوشې شوي.
خبرپاڼې زياته کړې، چې په اسلام آباد کې د افغانستان سفارت بیاهم پر پاکستاني چارواکو غږ کوي، چې په پاکستان کې د مېشتو کډوالو او مسافرو افغانانو، په ځانګړې توګه د ښځو، ماشومانو، سپین ږیرو او ناروغانو زنداني کول او ځورونه، خورا دردوونکې ده او د دواړو وروڼو هېوادونو د اړیکو لپاره ښه پایله نلري.
سرچينې همدارنګه د دغو بنديانو د ژر تر ژره خوشې کېدو او د دغه لړۍ د پای ته رسولو غوښتنه کړې ده.