د ریاست الوزرا اداري مرستیال د اندخوی د قومي مشرانو ستونزې واورېدې
د ریاست الوزار اداري مرستیال مولوي عبدالسلام حنفي د هېواد شمالي ولایتونو ته د سفر په ترڅ کې پرون د فاریاب ولایت د اندخوی د څلورګونه ولسوالیو له دیني عالمانو، مخورو، قومي مشرانو، سوداګرو او صنعتکارانو سره وکتل.
د معمار د خبری آژانس د خبر له مخې:مولوي عبدالسلام حنفي په دغه کتنه کې د اندخوی د مشرانو ستونزې واورېدې او ژمنه يې وکړه، چې د حل په موخه به يې اړوندو ارګانونو ته ورسوي.
نوموړي ډاډ ورکړ، چې د قوش تپې کرنیز کانال د ملي پروژې په بشپړوېدو سره به د ځايي خلکو د اوبو د کموالي ستونزه حل او د اندخوی سلګونه جریبه شاړې ځمکې به خړوبې شي.
د یادونې وړ ده، چې د قوش تېپې ملي کانال، چې د بلخ د کلدار په ولسوالۍ کې د آمو له سیند څخه جلا کېږي او د ۲۸۵ کیلو متره په اوږدوالي د فاریاب تر اندخوی پورې رسېږي اوسمهال يې د جوړولو چارې په چټکۍ سره روانې دي