د طالبانو د بهرنیو چارو وزارت: په ډیموکراسۍ کې د ښځو پر وړاندې د تاوتریخوالي او تیري کچه لوړه ده
د طالبانو د بهرنیو چارو وزارت ویاند عبدالقهار بلخي ادعا کړې، چې په ډیموکراسۍ کې د ښځو پر وړاندې د تاوتریخوالي او تیري کچه لوړه ده.
هغه نن (شنبه، د قوس په پنځمه) ټویټ وکړ چې په متحده ایالاتو کې له هرو دریو ښځو څخه یوه یې د جنسي تیري او تاوتریخوالي تجربه کوي. د بلخي په وینا دا خبره په نورو دیموکراتیکو حکومتونو کې هم روان دي.
د طالبانو دغه ویاند ویلي دي چې اسلامي حکومتونه مکلف دي چې له ورته برخلیک څخه د ښځو د خوندیتوب لپاره اقدامات وکړي.
نوموړي په افغانستان کې د ملګرو ملتونو د عمومي منشي د مرستیال دفتر (یوناما) هغه څرګندونې ناسمې وبللې، چې ویلي یې و، دغه هېواد په نړۍ کې د ښځو پر وړاندې د تاوتریخوالي تر ټولو لوړه کچه لري.
یوناما ویلي چې د تاوتریخوالي پای ته رسول او د ښځو او نجونو د حقونو تامین د تلپاتې سولې لپاره اړین دی.
په افغانستان کې ښځې او نجونې د طالبانو له واکمنۍ وروسته له خپلو آزادیو او اساسي حقونو بې برخې شوې دي.
د طالبانو د واکمنۍ پر مهال ښځې نه شي کولای په دولتي ادارو کې کار وکړي او له شپږم ټولګي څخه پورته نجونې له ښوونځي څخه بې برخې دي.