پوتین یو ځل بیا په افغانستان کې د ټولو توکمونو په ګډون د یوه ټول شموله حکومت د جوړولو غوښتنه وکړه
د روسیې ولسمشر ولادیمیر پوتین ویلي، چې په افغانستان کې د یوه ټول شموله حکومت جوړول د روسیې او د سیمې د هېوادونو لپاره لومړیتوب دی.
د معمار وحدت د خبری آژانس د خبر له مخې؛ پوتین د چهارشنبې په ورځ (د قوس ۲مه) د ډله ییز امنیتي تړون د مشرانو په غونډه کې وویل چې له افغانستان څخه د ګډ امنیتي تړون د غړو هېوادونو خاورې ته د بېلابېلو نړیوالو تروریستي سازمانونو د وسله والو د نفوذ خطر لا هم لوړ دی.
په دې کتنه کې ياد شوي کس وويل، هېواد يې په دې باور دى چې د افغانستان د ستونزې د ټولو مهمو اړخونو په اړه د ډله ييزو امنيتي تړونونو د سازمان په چوکاټ کې لا زياتې همغږۍ ته اړتيا ده.
د هغه په وينا، اړينه ده چې د ترهګرۍ، افراطيت او نشه يي توکو د جرمونو د ګواښونو پر وخت د کشف په برخه کې له نږدې کار وکړي.
دا په داسې حال کې ده، چې پر افغانستان د طالبانو له ۱۵ میاشتو واکمنۍ وروسته، هېڅ هېواد دغه ډله په رسمیت نه ده پېژندلې.
د یو ټول شموله حکومت جوړول د نړۍ د هیوادونو د پیژندلو لپاره یو له شرطونو څخه دی.