د ملي مقاومت جبهه: د افغانستان په اړه د ملګرو ملتونو پریکړه لیک متناقض دی
د احمد مسعود په مشرۍ د مقاومت جبهې یو ځل بیا خبرداری ورکړی چې افغانستان په چټکۍ سره د سیمې او نړۍ لپاره یو احتمالي خطر دی.
د معمار وحدت د خبری آژانس د خبر له مخې؛ دغې جبهې نن (شنبه، د عقرب ۲۱مه) په یوه خبرپاڼه کې ویلي، که د «تروریستي ډلو د ظلم او استبداد» لړۍ مخه ونه نیول شي، ډېر ژر به ناامني او ترهګري سیمې او نړۍ ته خپره شي.
د افغانستان په اړه د ملګرو ملتونو د عمومي اسامبلې د نوي پرېکړه ليک د تصويب په غبرګون کې د مقاومت جبهې زياته کړې، چې دغه پرېکړه ليک له ډېرو پاراډکسونو ډک دی.
د دې جبهې په وینا، ملګرو ملتونو له طالبانو وغوښتل چې د ترهګرو ډلو پر وړاندې مبارزه وکړي، په داسې حال کې چې دوی “په خپله د نړیوالې ترهګرۍ لویه برخه ده.”
په دې اعلامیه کې ویل شوي چې نړیواله ټولنه له طالبانو تمه لري چې د نشه یي توکو د کښت، پروسس او لیږد پر وړاندې خپلې ژمنې پوره کړي، په داسې حال کې چې د تېرو شلو کلونو په جګړه کې د نشه يي توکو کښت او تولید د طالبانو لپاره د عایداتو یوه له بنسټیزو او سترو سرچینو څخه بلل کېږي.