سره صليب: په افغانستان کې په راتلونکي ژمي کې د بشري وضعيت خرابېدل د اندېښنې وړ دي

د معمار وحدت د خبری آژانس د خبر له مخې؛ په افغانستان کې د سره صلیب د دفتر مشرې ایلوا فیلن پرون په خپل ټویټر کې لیکلي چې د ژمي په رارسیدو سره به په افغانستان کې بشري وضعیت نور هم خراب شي.

په افغانستان کې د سره صليب د نړيوالې کمېټې د دغه چارواکي په وينا، په دغه هېواد کې د اړمنو کسانو د ساتنې لپاره پياوړي نړيوال ملاتړ ته اړتيا ده.

دغې کمېټې په خپل یوه راپور کې دا هم ویلي، چې دا مهال په افغانستان کې شاوخوا ۲۰ میلیونه وګړي کافي خوراکي توکو ته لاسرسی نه لري او تر ۲۴ میلیونه ډېر خلک لا هم بشري مرستو ته اړتیا لري.

سره صلیب اندېښنه ښودلې چې په دغه هېواد کې د بشري ناورین شدت به میلیونونه وګړي بې وزلۍ ته اړ کړي.

د دغې کمیټې په وینا، کونډې او یتیمان په افغانستان کې د اوسني بشري ناورین تر ټولو زیات قربانیان دي او په ډیرو وختونو کې د ورځې یو ځل هم مناسبه خواړه نه شي خوړلی.

دغې کمېټې یو ځل بیا ټینګار کړی چې پر افغانستان د طالبانو له واکمنۍ وروسته په دغه هېواد کې ۷۰۰ زره کسانو خپلې دندې له لاسه ورکړې دي.

د روغتیا د نړیوال سازمان د شمېرو له مخې، په افغانستان کې نږدې ۱۹ میلیونه وګړي د خوړو له نه خوندیتوب سره مخ دي او سږ کال تر ۳۴ زره ډېر ماشومان په سختې خوارځواکۍ اخته دي او په روغتونونو کې بستر شوي دي.