حکمتیار د امریکا او طالبانو ترمنځ د خبرو اترو نوی تړون اعلان کړ
د افغانستان د حزب اسلامي مشر وايي، د امریکا او طالبانو ترمنځ د دواړو لورو د استخباراتي چارواکو په کچه خبرې روانې دي، چې له ځینې پرمختګونه شوي او په ځینو شیانو هوکړه شوې ده.
د معمار وحدت د خبری آژانس د خبر له مخې؛ د افغانستان د حزب اسلامي مشر ګلبدین حکمتیار په کابل کې د جمعې له لمانځه مخکې په وینا کې وویل چې امریکا او د طالبانو حکومت د دوحې د هوکړې په څېر یوې هوکړې ته د رسېدو هڅې کوي.
په همدې حال کې حکمتیار د دوحې هوکړه ناکامه بولي او وايي چې دغه تړون د افغانستان د اوسني بد وضعیت لامل شوی.
د راپورونو له مخې امریکايي پلاوي د امریکا د استخباراتو د مرکزي ادارې د مرستیال او د افغانستان لپاره د امریکا د ځانګړي استازي په شتون سره د روان کال د میزان په میاشت په قطر کې د طالبانو د استخباراتو د عمومي مشر عبدالحق وثیق په مشرۍ د طالبانو له حکومتي پلاوي سره وکتل.
د حکمتيار په وينا، په دې ناسته کې د دواړو لورو له هوکړې وروسته د افغانستان پر فضا د امريکايي بې پيلوټه الوتکو الوتنې کمې شوې دي.