د مقاومت جبهې په پنجشېر کې د طالبانو د ۳۲ غړو د وژل کېدو خبر ورکړ
د مقاومت جبهه ادعا کوي چې په پنجشیر کې د دغې جبهې د ځواکونو په ځوابي برید کې ۳۲ طالبان وژل شوي دي.
د معمار وحدت د خبری آژانس د خبر له مخې؛ د سنبلې په ۱۹ مه شپه د مقاومت جبهې د یوې خبرپاڼې په خپرولو سره ادعا کړې وه چې پرون په پنجشیر کې له څو ساعته جګړې وروسته ۳۲ طالبان وژل شوي او ۱۳ نور ټپیان شوي دي.
د دغې خبرپاڼې پر بنسټ، طالبانو تېره ورځ د فراه، ابدره، حصارک، مانجهور، عبدالله خېلو، شابه، د دره او آبشار کوماندو، پشغور او خنج په سیمو کې د ملي مقاومت د ځواکونو پر پوستو پراخ بریدونه پیل کړل. خو دا بریدونه ناکام شول.
سیمه ییزو سرچینو هم پرون ۸صبح ورځپاڼې ته تایید کړه، چې په پنجشیر او اندرابه کې د طالبانو د نظامي مشر ملا عبدالقیوم ذاکر په مشرۍ د طالبانو تر ټولو ستر عملیات د پنجشیر په پنځو ولسوالیو کې ناکام شوي دي.
طالبانو تر اوسه د دغو ادعاوو په اړه څه نه دي ویلي.
د يادونې ده، چې د دې عملياتو تر پيل وړاندې طالبانو د پنجشېر له بېلابېلو سيمو لسګونه کورنۍ کډه کولو ته اړې کړې وې.