ذبیح الله مجاهد: د ډله ییزو رسنیو قانون به ډېر ژر نافذ شي
د طالبانو د حکومت د اطلاعاتو او کلتور وزارت چارواکو د سې شنبې په ورځ د سنبلې په ۱۵ مه د دې ادارې د یو کلن فعالیتونو د راپور ورکولو پر مهال وویل چې دا مهال په افغانستان کې ۲۱۹ رسنۍ فعالیت کوي او زیاته یې کړه چې د غیرشرعي خپرونې ۹۵٪ کمې شوې دي.
د معمار وحدت د خبری آژانس د خبر له مخې؛ د طالبانو د حکومت ویاند وايي، د پخواني حکومت د ډله ییزو رسنیو قانون د دغې ډلې د حکومت له خوا تعدیل شوی او د تصویب لپاره د طالبانو مشر ته استول شوی دی. مجاهد په دوام وویل چې د دوی د واکمنۍ په یو کال کې د هیڅ رسنۍ د فعالیت مخه نه ده نیول شوې.
ذبیح الله مجاهد نن ملت ته د حکومت د حساب ورکونې په پروګرام کې وویل، چې په دیني او فرهنګي برخو کې ځینې اصلاحات راغلي دي.
مجاهد زياته کړه، چې د طالبانو د مشر له خوا د ډله ييزو رسنيو د قانون له تصويب وروسته به دغه قانون عملي شي.
دا مهال په افغانستان کې ۲۱۹ رسنۍ فعالیت کوي او زیاتوي چې ناقانونه خپرونې ۹۵ سلنه کمې شوي دي.
د دغه وزارت د نشراتو مرستیال حیاتالله مهاجر فراهي وايي، هغه کتابونه چې الحاد خپروي پیژندل شوي.
د طالبانو ویاند هم د ځینو کتابونو پلور منع اعلان کړی دی.
د هغه په وينا، هغه کتابونه چې له ديني ارزښتونو او ملي ګټو سره په ټکر کې وي، خپرېدل يې منع دي.
له دې وړاندې بې پولې خبريالانو سازمان ويلي وو، چې د ۲۰۲۱ کال د اګست له ۱۵مې وروسته د ۵۴۷ رسنيو له ډلې د ۲۱۹ رسنيو فعاليتونه بند شوي دي.
د بیان د ازادۍ د شاخص له مخې افغانستان د طالبانو تر واکمنۍ وروسته له ۱۲۲م څخه ۱۵۶م ته راښکته شوی دی.