د چین، افغانستان او پاکستان د کرنې په درې اړخیزه غونډه کې د ګډون لپاره چین ته د طالبانو د پلاوي سفر

د معمار پرس د خبر له مخې؛ د طالبانو د کرنې، اوبولګولو او مالدارۍ وزارت ویاند مصباح الدین مستعین وايي چی د دغه سفر موخه د چين د کرنې له پروګرامونو او لاسته راوړنو سره اشنا کول او د کرنې او مالدارۍ په برخه کې د دغه هېواد له تجربو ګټه اخيستل دي. د هغه په ​​وينا، دغه غونډه به لس ورځې دوام وکړي او په کې به د چين ټول کرنيز پروګرامونه، لس کلنه کړنلاره او د چين کرنيز پرمختګونه وڅېړل شي. د کرنې او مالدارۍ خونې د اجرائيه رئيس وسيم صافي هم د افغانستان د کرنې د ميکانيزم په برخه کې د دغې غونډې پر اهميت ټينګار وکړ او ويې ويل: د عصري کرنيزو ماشينونو په درلودلو سره چين په دې برخه کې مهم رول لوبولی شي.