په عراق کې د امریکا د پوځي حضور د پای ته رسیدو احتمال

د معمار پرس د خبر له مخې؛ راتلونکې میاشت امریکا ته د عراق د بهرنیو چارو د وزیر د سفر په ترڅ کې هغه او د هغه امریکايي سیال به د یوه خبري کنفرانس په ترڅ کې له دغه هېواده د امریکايي ځواکونو د وتلو رسمي اعلان وکړي. په پام کې ده چې د امریکايي ایتلاف پوځي ځواکونه د ۲۰۲۵ کال په سپټمبر کې له دغه هېواده ووځي. همداراز دغه ځواکونه به د ۲۰۲۶ کال په سپټمبر میاشت کې له کردستان سیمې ووځي. په واشنګټن کې د عراقي پلاوي د غړي جواد البولاني په وینا، دواړه خواوې د یوې موافقې د پای ته رسولو په “وروستي پړاو” کې دي، په دې سره چې د دغو ځواکونو ماموریت پای ته نږدې شوی دی. د عراق حکومت ته نږدې سرچینو څرګنده کړې چې بغداد او واشنګټن موافقه کړې چې د ایتلافي ماموریت د یوې برخې په توګه په عراق کې د میشتو امریکایي ځواکونو د یوې برخې ایستل پیل کړي.