په افغانستان کې د ټول شموله حکومت پر جوړولو د یوناما د مشر ټینګار

د معمار وحدت د خبري اژانس د خبر له مخې: په افغانستان کې د ملګرو ملتو د دفتر مشر مارکس پوتزل د سرپرست حکومت په کابینه کښې په ټول شموله کیدو ټینګار وکړ.

پوتزل له طلوع نیوز سره په مرکه کې ویلي چې د سرپرست حکومت د رسمیت پېژندلو لپاره لومړی داخلي مشروعیت ته اړتیا ده. نوموړی په دې خبرو کې اوسنی حکومت ټول شموله نه ګڼي.

مارکس پوتزل وویل چې د افغانستان د حکومت لپاره تر ټولو اړینه ده چې داخلي مشروعیت ولري، یعنې د ټاکنو په توګه، د ټولپوښتنې په توګه، د لویې جرګې په توګه، یعنې خلک باید رایه ورکړي.

مارکس پوتزل زیاته کړه چې د افغانستان اقتصادي او ټولنیز وضعیت خورا کمزوری او ستونزمن دی.

په دې خبرو کې د یوناما مشر د اساسي قانون نشتوالي ته هم اشاره وکړه او سرپرست حکومت یې له اوسنیو ننګونو سره د مبارزې په برخه کې د پلان په نشتوالي تورن کړ.

هغه وايي چې موږ وينو چې يو پلان نشته او اساسي قانون په کې نشته او نور قوانين نه شته، اساسي قانون د اقتصادي بيارغونې مهم شرط دى.

په ورته وخت کې د طالبانو د سرپرستې کابینې مسوولین خپله کابینه ټول شموله بولي.