د ملګرو ملتونو سرمنشي انتونیو ګوترش د دوشنبې په ورځ (د حوت په ۲۱ مه) د ملګرو ملتونو د ښځو د وضعیت په اړه د کمیسیون په ۶۸مه غونډه کې وویل: په افغانستان کې طالبانو د نجونو او ښځو پر وړاندې تر ۵۰ ډېر حکمونه صادر کړي دي. د ملګرو ملتو سرمنشي په دوام وویل چې د طالبانو دغه حکمونه په افغان نجونو او ښځو ظلم کوي. هغه د خپلو خبرو په یوه بله برخه کې زیاته کړه: په ټوله نړۍ کې جګړې او کړکېچونه مخ په زیاتېدو دي او پر ښځو او نجونو یې ناوړه اغېزې کړې دي. دا په داسې حال کې ده چې طالبانو د خپلې واکمنۍ په څه باندې دوو کلونو کې د هېواد پر نجونو او ښځو پراخ بندیزونه لګولي دي.