په افغانستان کې د ځانګړي استازي د ټاکلو په اړه د ملګرو ملتونو د امنیت شورا د وروستي پریکړه لیک په غبرګون کې د طالبانو د بهرنیو چارو وزارت ټینګار کړی چې د یوناما له شتون سره سره د اضافي ځانګړي استازي ټاکل ضروري نه دي. عبدالقهار بلخي زیاته کړه: د افغانستان حکومت یو ځل بیا ټینګار کوي چې په کابل کې د ملګرو ملتونو د استازي دفتر له شتون سره سره د افغانستان لپاره د اضافي ځانګړي استازي ټاکل غیر ضروري ګڼل کېږي ځکه چې د ځمکې پر سر حقایق دا په ډاګه کوي چې افغانستان په جګړه کې ښکیل هیواد نه دی. له بلې خوا د طالبانو مخالفانو د افغانستان د چارو لپاره د ځانګړي استازي د ټاکلو د وړاندیز هرکلی کړی او دا یې د ملګرو ملتونو د اهدافو د پرمختګ لپاره یو مثبت ګام بللی دی. له هغه وخته چې طالبان په افغانستان کې واکمن دي، د ملګرو ملتونو بېلابېلې برخې کله ناکله له طالبانو سره د خبرو اترو لپاره بېلابېلې تګلارې لري. ځینې ​​په دې باور دي، چې له طالبانو سره باید بې قید او شرطه خبرې وشي او ځینې بیا په دې باور دي، چې د دغه بنسټ د شرطونو له منلو پرته باید د طالبانو غوښتنې په پام کې ونه نیول شي. که څه هم د ملګرو ملتونو د امنیت شورا ځینې غړي له طالبانو سره د خبرو د څرنګوالي په اړه شکمن دي. په هرصورت، د طالبانو په وړاندې د امنیت شورا د ټولو غړو عمومي چلند محتاط او د دوی په وړاندې د نړیوالې ټولنې د نظر پر بنسټ دی. ځکه که دوی له طالبانو سره په بشپړه توګه اړیکي ولري، نو د افغانانو د حقونو په ړنګولو او د دې ډلې په ملاتړ به تورن شي. د نړیوالې ټولنې او د افغانستان د خلکو د پرله پسې غوښتنو په مقابل کې، د یوه ټول شموله حکومت د جوړولو او د ښوونځیو او پوهنتونونو د بیا پرانستلو لپاره دغې ډلې مثبت ځواب نه دی ورکړی او خپلو محدودو سیاستونو ته یې دوام ورکړی دی. خو د ملګرو ملتونو د امنیت شورا له خوا د ځانګړي استازي د ټاکلو وړاندیز دا په ډاګه کوي چې یوناما له طالبانو سره په خبرو کې د پام وړ بریا نه ده ترلاسه کړې. له بلې خوا طالبان هم د حکومتدارۍ په طریقه کې د بدلون اراده نه لري. د پایلې په توګه، د ملګرو ملتونو د ځانګړي استازي ټاکنې به کومه پایله ونه لري. د افغانستان حالات به هغه وخت مناسب وي چې طالبان د خپلې تګلارې د بدلولو اراده ولري او ملګري ملتونه به په جدي او دوامداره توګه د خپل د غوښتنو د پوره کولو لپاره صحنې ته ننوځي. که نه نو طالبان او ملګري ملتونه خپلو موخو ته ونه‌رسېږي.