د ایران د اسلامي جمهوریت د بهرنیو چارو وزیر حسین امیر عبداللهیان د پنجشنبې په ورځ (د اسد ۲۷) د یوه لوړ پوړي پلاوي په مشرۍ د سعودي عربستان پلازمینې ریاض ته ولاړ. د ایران د بهرنیو چارو وزارت په یوه ټویټ کې لیکلي چې د حسین امیرعبداللهیان دا سفر د هغه د سعودي سیال فیصل بن فرحان په بلنه ترسره شو. په سعودي عربستان کې د ایران د اسلامي جمهوریت سفیر علیرضا عنایتي د ایسنا خبري آژانس ته ویلي دي چې ښاغلی عبداللهیان به په دغه سفر کې له ریاض سره د هراړخیزو اړیکو د پراختیا لپاره د تهران پر هوډ ټینګار وکړي. د تهران او ریاض تر منځ د اړیکو له بیا پیلیدو وروسته د سعودي عربستان د بهرنیو چارو وزیر د روان کال د جوزا په میاشت کې تهران ته سفر وکړ.