د افغانستان لپاره د ملګرو ملتونو د سرمنشي نوي ځانګړي استازي ډانیل اندریس د سرپرست حکومت له اداري مرستیال سره کتلي او ویلي یې دي چې افغانستان د اقلیم د سختو بدلونونو له امله زیانمن شوی دی.
د معمار پرس د خبر له مخې؛ د سرپرست حکومت اعلان کړی چې د یکشنبې په ورځ (د اسد ۲۲مه) په غونډه کې ښاغلي اندریس دغه څرګندونې وکړې چی افغانستان د ملګرو ملتونو بشري مرستو او همکارۍ ته اړتیا لري. هغه زیاته کړه، افغانانو ته د بشري مرستو د تنظیم، اقتصادي او اقلیمي ستونزو د حل په برخو کې له طالبانو سره نږدې همغږي، همکارۍ او اړیکو ته اړتیا ده. ځکه افغانستان د سیمې یو له هغو هېوادونو څخه دی چې د اقلیم د بدلون او وچکالۍ له امله سخت ځپل شوی دی.