د معمار پرس د خبر له مخې؛ د امریکا پخواني ولسمشر او ولسمشرۍ ته نوماند ډونالډ ټرمپ یو ځل بیا د خپلو پلویانو په منځ کې له افغانستانه د امریکا د وتلو موضوع مطرح کړې او ویلي یې دي چی که هغه راتلونکې ټاکنې وګټي، د بګرام هوايي اډه به بېرته ترلاسه کړي. ټرمپ په افغانستان کې د امریکا حضور له چین سره نږدېوالی وباله او زیاته یې کړه چې افغانستان له چین سره د نږدېوالي له امله امریکا ته مهم دی. د ټرمپ په وینا د بګرام هوايي اډې له لاسه ورکول د امریکا لپاره نه جبرانېدونکې ضایعه ده. که څه هم طالبانو د ډونالډ ټرمپ د څرګندونو په اړه څه نه دي ویلي؛ خو د دوی چارواکو تر دې وړاندې هم څو ځلې ټینګار کړی، چې هېڅ هېواد ته به اجازه ورنه کړي، چې په افغانستان کې پوځي حضور ولري.