د معمار پرس د خبر له مخې؛ د بدخشان په واخان کې د ورېښمو د لویې لارې د جوړولو پروژې مسوولینو اعلان وکړ چې دغه تاریخي لویه لار به ډېر ژر د افغانستان او چین پولې صفري نقطې ته ورسېږي او د کار لپاره به چمتو شي. د دې پروژې په بشپړیدو سره به د ختیځې او جنوبي اسیا تر منځ ځمکنۍ پیوستون اسانه شي او د افغانستان د اقتصادي پرمختګ لپاره به روښانه لید رامنځته شي. د دغه سړک د جوړولو کار چې یو کال مخکې پیل شوی و، د افغانستان او سیمې لپاره یوه اقتصادي اډه ګڼل کیږي. طالبانو د واخان سیمې د ستراتیژیک اهمیت له امله د دغې پروژې پر عملي کیدو ټینګار کړی او هیله لري چې له چین سره په نښلیدو او د دغه هیواد د بندرونو په پرانیستلو سره به د افغانستان اقتصادي وضعیت ښه شي.