د معمار پرس د خبر له مخې؛ د طالبانو د صنایعو او سوداګرۍ وزارت د اطلاعاتو او رسنیو په مرکز کې «د دغې ډلې د دفترونو د یو کلن لاسته راوړنو تشریح» په پروګرام کې وویل: افغانستان په تېر کال کې لس میلیارده ډالره سوداګري درلوده. د طالبانو د صنایعو او سوداګرۍ وزارت په دوام وویل، چې له دې ۱۰ میلیارده ډالرو څخه ۱،۸ میلیارده یې صادرات او له ۸ میلیاردو ډېر یې واردات دي. دغه وزارت زیاته کړه، چې قزاقستان ته د افغانستان صادرات ۲.۵٪، چین ته ۱۶٪، ایران ته ۱۹٪، ترکیې ته ۵۳٪ او روسیې ته ۵۴٪ زیات شوي دي. د دوی د څرګندونو له مخې، په دې موده کې ۱۰۰ تولیدي فابریکې پرانېستل شوې، څه باندې ۱۰۰۰ صنعتي او تولیدي شرکتونو ته جوازونه ورکړل شوي، څه باندې ۶۵۰ شرکتونو ته تعرفې ورکړل شوې او له ۲۳۰۰۰ څخه زیاتو د پانګونې جوازونه تمدید، نوي او تعدیل شوي دي.