د معمار پرس د خبر له مخې؛ د طالبانو د دفاع وزارت ویاند عنایت الله خوارزمي د دوشنبې په ورځ (د اسد ۸مه) وویل چې په بګرام کې د هوايي مدافعې په نصبولو کې د چین د مرستې په اړه د دغه وزارت له لوري خپور شوی مکتوب جعلي دی. تر دې وړاندې په ځینو سیمه ییزو رسنیو کې یو لیک خپور شوی و چې په کې د چین په همکارۍ د افغانستان د هوايي حریم د کنټرول په اړه د چمتووالي یادونه شوې وه. د پنجشنبې په ورځ، د اسد په څلورمه، د طالبانو د دفاع وزیر ملا یعقوب د افغانستان په هوايي حریم کې د بې پیلوټه الوتکو ګزمې ته په اشارې سره وویل چې دا ډله هڅه کوي د هوايي حریم کنټرول په لاس کې واخلي.