د پاکستان پوځ د یوې اعلامیې په خپرولو سره اعلان کړی چې د پاکستان دښمنان د افغانستان له خاورې په پاکستان کې دننه پر امنیتی ځواکونو او بې ګناه خلکو د حملو لپاره کاروی. د پاکستان د وسله والو ځواکونو د رسنیو څانګې ویلي دي چې په راولپنډۍ کې د قومندانانو ۸۳مه غونډه وشوه. په دغه بیانیه کې راغلي دي چې د غونډې ګډونوالو “له افغانستان څخه د بریدونو د دوام او په دغه هیواد کې د ترورېزم د کارونې په اړه خپله جدي اندیښنه څرګنده کړه.” په دې غونډه کې د پاکستان د پوځ قومندانانو په پښتني قبایلي سیمو او بلوچستان کې د ترهګرۍ او پانګونې پر “پریکنده ماتې” ټینګار وکړ. خو د طالبانو وياند ذبيح الله مجاهد وايي، چې د پاکستاني چارواکو بې بنسټه تورونه به له پاکستان سره د دې ډلې اړيکې خرابې کړي. د طالبانو د ډلې ویاند وویل: مونږ له پاکستان سره د اړیکو د ښه کولو لپاره ډیرې هڅې وکړې خو د دغې ډلې په خلاف د پاکستان بې اساسه تورونه د هیڅ درد دوا نه کوي. مجاهد څرګنده کړه، چې په پاکستان کې ناامنۍ له دغې ډلې سره هېڅ تړاو نه لري، بلکې د دغه هېواد د امنیتي ځواکونو د کمزورتیا لامل دي. پاکستاني چارواکو په وار وار اعلان کړی چې تحریک طالبان پاکستان په افغانستان کې پټنځایونه لري او له دغه هیواد څخه د پاکستان پر ضد ترهګریز بریدونه ترسره کوي. خو د طالبانو حکومت تل د پاکستاني چارواکو څرګندونې ردوي او دا د پاکستان داخلي مسئله بولي. د تحریک طالبان پاکستان مسله د افغانستان او پاکستان په اړیکو کې یوه ننګونه ګرځېدلې ده. که څه هم د طالبانو او پاکستان تر منځ اړیکې له اوږدې مودې راهیسې د سیاسي او مذهبي حسابونو پر بنسټ ولاړې وې خو د پاکستاني طالبانو کړنې د دغو دواړو هېوادونو په اړیکو کې یو ګواښ ګڼل کېدای شي. د طالبانو او پاکستان تحریک طالبان عقیده او سیاسي پیوستون د دغو دوو ډلو مشترک اصل دی او داسې نه بریښي چې د پاکستان حکومت دې تمه ولري چې طالبان دې د دې ډلې ملاتړ نه کوي. په هرصورت، د TTP احتمالي ملاتړ لګښتونه لري چې طالبان یې باید ورکړي. طالبان له ډیرو داخلي او خارجي ستونزو سره مخ دي او د پاکستاني مشرانو نارضایتي د طالبانو لپاره یوه ستونزه کیدای شي ځکه له یوې خوا ښايي د افغانستان او پاکستان ترمنځ پر سیاسي او سوداګریزو تعاملاتو اغېز وکړي او له بلې خوا دا به د طالبانو او پاکستان ترمنځ د احتمالي جګړې لامل شي، چې د افغان حکومت لپاره به دروند وي.