د معمار پرس د خبر له مخې: د طالبانو د سرپرست حکومت ویاند ذبیح الله مجاهد په خپله یوه پاڼه کې لیکلي دي چی د کورنیو چارو وزیر سراج الدین حقاني او د دې ډلې د استخباراتو عمومي مشر عبدالحق وثیق د ابوظبۍ په الشاطي ماڼۍ کې له شیخ محمد بن زاید بن سلطان آل نهیان سره کتلي دي. سرچينې زياته کړې، چې دغه کتنه د دوشنبې په ورځ (د جوزا ١٤مه) ترسره شوه او دواړو لورو د افغانستان او متحده عربي اماراتو د اړيکو پر پياوړتيا خبرې وکړې. له بلې خوا د اماراتو رسنیو ویلي، چې په دې کتنه کې د اقتصادي او پراختیايي برخو او په افغانستان کې د بیارغونې او پراختیا پر ملاتړ خبرې وشوې.