د طالبانو ویاند په کابل کې په یوه خبري غونډه کې یو ځل بیا د نړۍ له هېوادونو د افغانستان د سرپرست حکومت په رسمیت پېژندلو غوښتنه وکړه. د معمار پرس د خبر له مخې؛ ذبیح الله مجاهد ویلي، دا د افغانستان د سرپرست حکومت حق دی چې په رسمیت وپېژندل شي او ویې ویل: “موږ له نړیوالې ټولنې سره نږدې او دیپلوماتیکې اړیکې غواړو او باور لرو چې زموږ په رسمیت پېژندنه به ټولو ته ګټه ورسوي.” هغه زیاته کړه: که موږ په رسمیت وپېژندل شو، کولای شو چی د اقتصاد، امنیت او پرمختګ په ګډون په بېلابېلو برخو کې لا ډېر پرمختګ وکړو. مجاهد همداراز د هر هغه هېواد ستاینه وکړه چې د طالبانو د حکومت په رسمیت پېژندلو کې مخکښ وی. تر اوسه هیڅ هیواد په رسمي توګه د طالبانو حکومت په رسمیت نه دی پیژندلی.