د معمار پرس د خبر له مخې؛ په ورته وخت کې په دوحه کې د افغانستان په چارو کې د هېوادونو د ځانګړيو استازو د غونډې په څنډه کې د کاناډا د کالګاري ښار په ګډون په کاناډا کې مېشتو یو شمېر افغانانو مظاهره وکړه او ویې ویل چی د نړيوالې ټولنې له خوا د طالبانو د رسمیت پيژندلو لپاره هر ډول هڅې به د افغانانو په سترګو کې د اعتبار وړ نه وي. د دوحې غونډه پرون د ملګرو ملتونو د سرمنشي انتونیو ګوتریش په کوربه توب پیل شوه او تر نن (دوشنبه، د دلو ۳۰مه) به دوام وکړي. په کاناډا کې مېشت افغان اتباع د یکشنبې په ورځ راغونډ شوي وو او د نړیوالو معیارونو او د افغانانو د شرایطو او اړتیاوو له پېچلتیا سره سم د ځانګړي استازي په ټاکلو کې یې د لا دقت او پاملرنې غوښتنه وکړه. دوی طالبان یوه تروریستي ډله وبلله او ویې ویل چې د نړیوالې ټولنې له خوا د دغې ډلې په رسمیت پېژندلو لپاره هر ډول هڅې د افغانانو په سترګو کې د منلو وړ نه دي.