په کابل کې د ایران د سفارت ځانګړی استازی او مشر حسن کاظمي قمي دا خبره کوي چی د دغه هېواد له نظره “په دننه کې له تبعیض پرته حکومتداري او په سیمه ییز چاپیریال کې له ګاونډیانو سره ښه ګاونډیتوب او همغږي د سیمه ییزې پروسې د پرمختګ دوه اړینې برخې دي”. په کابل کې د ایران د سفارت ځانګړي استازي او مشر نن (دوشنبه، د دلو ۹مه) چې په کابل کې د طالبانو د بهرنیو چارو وزارت په کوربه توب د افغانستان د سیمه ییزو همکاریو نوښت په غونډه کې برخه اخیستې وه، په ایکس کې لیکلي چې که چیرې دا دوه برخې “په یوه اعلامیه کې څرګند شي، دا به د سیمې هرکلي وکړي”. د ایران ځانګړي استازي په یوه بل پوسټ کې ویلي چې دا غونډه د روسیې په کازان ښار کې د مسکو په غونډه کې د ایران په وړاندیز او د طالبانو په بلنه جوړه شوې وه. دا لومړی ځل دی چې طالبان په کابل کې د ګاونډیو او سیمې د هېوادونو د سفیرانو او ځانګړو استازو په حضور کې د یوې سیمه ییزې ناستې کوربه توب کوي.