د طالبانو د ترانسپورت او ملکي هوايي چلند وزارت اعلان وکړ چې د ایران اسلامي جمهوریت «یزد ایر» د کابل نړیوال هوايي ډګر او بلخ هوايي ډګر ته خپلې الوتنې پیل کړي دي. دغه وزارت نن دوشنبه (د دلو ۲مه) په یوه بیانیه کې ویلي چې د ایران د اسلامي جمهوریت د یزد هوايي شرکت لومړۍ الوتنه نن له تهران څخه د کابل نړیوال هوايي ډګر ته وشوه. په دې خبرپاڼه کې راغلي دي چې یزد هوايي شرکت له تهران څخه د کابل نړیوال هوايي ډګر او د بلخ هوايي ډګر ته په خوندي ډول الوتنې وکړې.