د طالبانو د اوبو او انرژۍ وزارت اعلان وکړ چې د لوګر ولایت د خروار بند د بیارغونې او جوړولو کار پیل شوی دی.
د معمار پرس د خبر له مخې؛ طالبانو د افغانستان د اوبو او انرجۍ وزارت د پنجشنبې په ورځ (د قوس ۹مه) په یوه خبرپاڼه کې ویلي چې د دغه وزارت سرپرست او د لوګر لپاره د طالبانو والي ملا عبداللطیف منصور د خروار بند د بیارغونې او جوړولو کار پیل کړ. د خروار بند د ٣٦ مترو په لوړوالي او ١٤٠ مترو په اوږدوالي سره د ١٧ ميليونه متر مکعب اوبو د زېرمه کولو ظرفيت لري، چې په بشپړېدو سره به يې شاوخوا شپږ زره هکتاره کرنيزه ځمکه خړوبه شي.