د معمار پرس د خبر له مخې؛ د طالبانو د لومړي وزیر د اقتصادي مرستیال ملا عبدالغني برادر دفتر د یکشنبې په ورځ (عقرب ۷مه) د ازبکستان د لومړي وزیر له مرستیال جمشید خوجااوف سره د لیدنې خبر ورکړ. د ملا برادر له دفتره په خپره شوې خبرپاڼه کې راغلي، چې دغه ازبک چارواکي د دغه هېواد د کرنې، انرجۍ، اوبو، کانونو او ترانسپورت له وزیرانو سره راغلي وو. د ملا برادر دفتر زیاته کړې، چې د ازبکستان د لومړي وزیر مرستیال هم د دغه هېواد په ترمذ ښار کې افغان سوداګرو ته د یوه لوی سوداګریز مرکز د سپارلو اعلان کړی دی.