د لوړو زده کړو وزارت سرپرست مولوي ندا محمد ندیم هلمند پوهنتون کې جوړې شوې غونډې ته په وینا کې وویل، چې دښمنان لګیا دي، څو زموږ علمي سيستم خراب او بدنام کړي، خو موږ به هېڅکله دوی ته اجازه ور نه کړو.
نوموړي دغه راز د هلمند پوهنتون له استادانو وغوښتل، چې باید ځوانان د اسلامي او افغاني ارزښتونو د ساتنې په فکر وروزي.
په دې غونډه کې د هلمند پوهنتون رئیس پوهنیار محمد سورګل عبدالرحمن مولوي ندا محمد ندیم ته ښه راغلاست ووایه او ترې و یې وغوښتل، چې دغه پوهنتون کې شته ستونزې حل او ورته دې د طب او انجنیرۍ پوهنځي هم ورکړل شي.
په همدې حال کې مولوي ندیم ډاد ورکړ، چې په هلمند پوهنتون کې به شته ستونزې حل، د رغولو چارو لپاره به يې بودجه ځانګړې او د استادانو د معاشونو ستونزه به هم حل کړي.
ورته مهال د هلمند مرستیال والي مولوي عبدالرحمن کندوزي د لوړو زده کړو وزارت سرپرست ته تر ښه راغلاست وروسته وویل، چې باید په هېواد کې ځوانانو ته د کار او زده کړو زمینه برابره شي تر څو بهرنیو هېوادونو ته د ځوانانو د تګ مخنیوی وشي.