د معمار وحدت د خبری آژانس د خبر له مخې؛ د رویټرز خبري اژانس د راپور له مخې، وانګ يي د امریکا د بهرنیو چارو له وزیر انتوني بلینکن سره په ټیلیفوني خبرو کې پر دې هم ټینګار وکړ چې پر بېجینګ د واشنګټن له خوا لګول شوي صادراتو کنټرول د دې مشروع حقونه سخت زیانمن کړي او باید اصلاح شي.

په دې ټیلیفوني خبرو کې بلینکن د اوکراین د جګړې او نړیوال امنیت او اقتصادي ثبات ته د ګواښونو په اړه هم خبرې وکړې.

د رویټرز په وینا، امریکا په وار وار د امریکا او چین ترمنځ د اړیکو د پرانیستې لارو پر ساتلو ټینګار کړی، خو په دې وروستیو کې یې دا خبره هم کړې، چې که بیجینګ پر اوکراین د روسیې د برید ملاتړ وکړي، دا مسله به ناوړه پایلې ولري.

چین چې د روسیې ستراتیژیک ملګری دی، د روسیې پر وړاندې د لویدیځ پر بندیزونو نیوکه کړې، خو په عین وخت کې یې له دغه پوځي کمپاین سره د مرستې لپاره یې نه دی ملاتړ کړی.

بلنکن له خپل چينايي سيال سره په تليفوني تماس کې د چين او امريکا د اړيکو د مسوول مديريت پر اړتيا هم ټينګار وکړ.

تېره اوونۍ د امریکا ولسمشر جو بایډن وویل چې واشنګټن له بیجینګ سره د شخړې په لټه کې نه دی او د چین ولسمشر شي جینپینګ ویلي چې بیجینګ له واشنګټن سره د داسې لارو چارو د موندلو لپاره کار کولو ته لېواله دی چې دواړو لورو ته ګټه ورسوي.

دا مسله په داسې حال کې راپورته کیږي چې دواړه یاد شوي چارواکي تمه کیږي چې راتلونکې میاشت په بالي کې د G20 سرمشریزې په څنډه کې سره وګوري.