د معمار وحدت د خبری آژانس د خبر له مخې؛ د طالبانو د امر په معروف او نهي له منکر وزارت ویاند محمد صادق عاکف نن وویل چې دغه اداره به د ښځو د اصلاح په برخه کې کار وکړي.

د هغه په ​​وينا، د دې رياست مسوولې مېرمنې به “د ښځو اصلاح” کوي او هغوى ته به مشورې او لارښوونې کوي.

هغه د حجاب په اړه وويل: “جامې بايد نازکه، تنګ او نرۍ نه وي او د هغو جامو سره ورته نه وي چې د غيرمسلمانو لخوا کارول کيږي، دې ته حجاب ويل کيږي.”

په دغه وزارت کې طالب چارواکو ویلي، چې د حجاب حکم په سمه توګه پلی شوی او د دوی په وینا، د هغې پایلې په ټولنه کې ښه لیدل کېدای شي.

له بلې خوا د دغه وزارت چارواکي چې د حکومت د رسنیو په مرکز کې یې د ” ملت ته حساب ورکونې” په پروګرام کې ګډون کړی و، ویلي چې تر اوسه د طالبانو د امنیتي ځواکونو شاوخوا ۹۰۰ غړي له دندو ګوښه شوي دي.

د طالبانو د امر په معروف او نهي له منکر وزارت د نظامي چارو مرستیال عبدالرحمن منیر په دې اړه وویل: هغه کسان چې کم عمره، په نشه يي توکو روږدي او د ږیرې خریل له لیکو څخه ایستل شوي دي.

د طالبانو د امر په معروف او نهي له منکر وزارت په داسې حال کې د ښځو د محتسب د دفتر د جوړولو اعلان وکړ چې د بشري حقونو یو شمېر مدافعین د دغه وزارت پر موجودیت او فعالیت سختې نیوکې کوي او ویل شوي چې دغه وزارت د ښځو پر وړاندې د محدودیتونو په لګولو او د فردي آزادیو په سرغړونو کې مهم رول لوبولی دی.